早排樂視廣發英雄帖，上面提示「提早開波 Your Next Super League」，唔少家庭觀眾已經猜測同中超（Chinese Football Association Super League）有關。果然，繼英超同世界盃之後，今日樂視體育又再宣布，獲得中國足球協會超級聯賽轉播權，更會以 4K 及 VR 技術直播賽事。除此之外，更會免費轉播本地足球賽事，支持港足咁話。
樂視公布，樂視體育香港將會與北京同步直播 2016 及 17 季度中超聯賽 480 多場賽事，所有樂視電視、手機、或者是「狂睇99」及「英超組合」用戶，都可以免費收睇，支援手機、電視、電腦、平板、電影院 5 種播放形式。除了 4K 超高清解像度，樂視亦會支援以 360 度全景及 VR 虛擬實景技術播放中超賽事，令球迷可以置身現場一樣，可惜英超及其他賽事則未支援以 VR 技術播放。首場中超賽事將於 3 月 4 日晚上 7:35 分開波，由廣州富力對河北華夏幸福。
發布會上樂視亦提到，除了英超及中超外，未來將會購入更多體育版權，換言之樂視將會轉播更多體育盛事，包括歐甲、西甲、職棒、奧運等等。樂視體育亦會免費播放香港的各項本地足球賽事，用戶同樣可以樂視電視、手機等裝置觀看；賽事更會轉播至中國大陸及海外，協助本地體育進一步發展。官方就話暫時只會轉播港足賽事，惟未支援 4K 及 VR 播放，另本地籃球同其他運動賽事的轉播權仍在商討中。不過最重要嘅係，賽事會有粵語旁述，香港人梗係聽返廣東話先夠親切本土啦喂。