CEO 親證 Tesla Model S 落水能游!?

Tesla 電動車身價非凡,輕輕「Hi」到都心痛啦,何況浸落水?仲要係電。動。車?不過早排有網民就發現,水浸時揸住架 Model S 竟然「入水能游,出水能跑」,仲有片為證,真正落雨也不怕,有冇咁勁先?

一位哈薩克網民將一段 Model S 在水中行駛的影片放上網,片中可見水高及車頭,整條行車隧道也浸沒了,不少車輛也「死火」無法前行。但片中的 Model S 就毫無問題,輕鬆駛過。外國傳媒廣泛報導事件,其後 Tesla CEO Elon Musk 在 Twitter 上回應指:「我們*當然*不鼓勵車主這樣做,不過 Model S 有足夠浮力,足以變身成船,利用輪胎推進前行一會兒。」他又指由於 Model S 的零件及電池均採用密封設計,因此在短時間內不會入水,可以繼續正常運作推進。他又在另一條 Twitter 中表示,Tesla 有意開發水陸兩用車,不過由於市場有限,只會視為周邊項目,不會當作主打產品。